पुढच्या आठवड्यात होणार मंत्रालय स्तरावर बैठक
बीड प्रतिनिधी – बीड येथे नवीन पंचतारांकित एमआयडीसी निर्माण करण्यासाठी आ.संदीप क्षीरसागरांचा नियमित पाठपुरावा सुरू आहे. त्या अनुषंगाने बुधवारी (दि.२२) रोजी आ.संदीप क्षीरसागर यांनी महाराष्ट्र राज्याचे उद्योगमंत्री उदय सामंत यांची भेट घेऊन निवेदन दिले. त्यावर उद्योगमंत्री यांनी पुढील आठवड्यात या विषयावर मंत्रालय स्तरावर बैठक आयोजित करण्याचे निर्देश संबंधितांना दिले आहेत.
बीड हा औद्योगिक आणि शैक्षणिक विकासाच्या दृष्टीने मागासलेला जिल्हा आहे. बीड जिल्ह्यात विकास करण्यासाठी बीडमध्ये पंचतारांकित एमआयडीसी होणे ही अत्यावश्यक बाब आहे. जेणेकरून याठिकाणी रोजगार निर्मिती होऊन तरूणांना रोजगार उपलब्ध होईल आणि आर्थिक चालना मिळेल. याबाबत आ.संदीप क्षीरसागर हे मागील अनेक दिवसांपासून शासन आणि प्रशासन स्तरावर पाठपुरावा करत आहेत. दरम्यान बीड शहरालगत असलेल्या घोडका राजुरी आणि काठोडा येथे नवीन एमआयडीसी होणेबाबत प्रशासकीय स्तरावर कार्यवाही सुरू आहे. या अनुषंगाने आ.संदीप क्षीरसागर यांनी उद्योगमंत्री उदय सामंत यांची भेट घेऊन याविषयावर सविस्तर चर्चा करून विषयाचे निवेदन मंत्री महोदयांना दिले. त्यावर उद्योगमंत्री उदय सामंत यांनी पुढच्या आठवड्यात या संदर्भात बैठक आयोजित करण्याचे निर्देश संबंधितांना दिले असून बीडमध्ये नवीन पंचतारांकित एमआयडीसी होण्याच्या वाटचालीकडे हे मोठे पाऊल असणार आहे.
