पाटोदा | प्रतिनिधी : राज्यात सुरू असलेल्या दूध भेसळविरोधी कारवाईच्या पार्श्वभूमीवर आमदार सुरेश धस यांनी सातत्याने आवाज उठवल्यानंतर आता काही समाजमाध्यमे व प्रसारमाध्यमांतून नियोजनबद्ध बदनामीचे कारस्थान सुरू असल्याचा आरोप प्राजक्ताताई धस यांनी केला आहे.
प्राजक्ताताई धस यांनी प्रसिद्धीस दिलेल्या भूमिकेत म्हटले आहे की, “गेल्या दहा वर्षांपासून माझा मांजर येथील दूध संघ, दूध पावडर प्रकल्प किंवा दूध व्यवसायाशी कोणताही संबंध नाही. माझ्याविरोधात कोणाकडे ठोस पुरावे असतील तर ते सार्वजनिक करावेत किंवा संबंधित तपास यंत्रणांकडे सादर करावेत. पुराव्याविना अफवा पसरवून दिशाभूल करण्याचा प्रयत्न थांबवावा.”
पुणे जिल्ह्यातील मांजर परिसरातील डेअरीबाबत संशयास्पद माहिती मिळाल्यानंतर अन्न व औषध प्रशासनाकडे चौकशीची मागणी केल्याचा दावाही त्यांनी केला आहे. दूध भेसळ हा जनतेच्या आरोग्याशी संबंधित गंभीर विषय असून, दोषींवर कठोर कारवाई व्हावी, हीच आमची भूमिका असल्याचे त्यांनी स्पष्ट केले.
दरम्यान, समाजमाध्यमांवर नाव न घेता होत असलेल्या आरोपांमुळे पत्रकारितेच्या नैतिकतेलाही धक्का बसत असल्याचे मत त्यांनी व्यक्त केले. अफवांवर विश्वास न ठेवता सत्य समोर येऊ द्यावे, असे आवाहनही त्यांनी केले आहे.
