२०१८ नंतर प्रथमच बीड आरटीओ कार्यालयाला पूर्णवेळ उपप्रादेशिक परिवहन अधिकारी मिळाले, पदभार स्वीकारला…
बीड | प्रतिनिधी
२०१८ नंतर प्रथमच बीड उपप्रादेशिक परिवहन कार्यालयाला (आरटीओ) पूर्णवेळ उपप्रादेशिक परिवहन अधिकारी लाभले असून, शासनाने सुरेश आव्हाड यांची या पदावर नियुक्ती केली आहे. १९९९ बॅचचे अधिकारी असलेले आव्हाड यापूर्वी पिंपरी-चिंचवड आरटीओ कार्यालयात कार्यरत होते. नुकत्याच शासनाने जाहीर केलेल्या पदोन्नती आदेशानुसार त्यांची बीड येथे बदली करण्यात आली आहे.
दीर्घकाळानंतर पूर्णवेळ अधिकारी मिळाल्याने आरटीओ कार्यालयातील प्रलंबित कामांना गती मिळेल, तसेच नागरिकांना अधिक कार्यक्षम आणि वेळेत सेवा मिळेल, अशी अपेक्षा व्यक्त केली जात आहे.
विशेषतः वाहन नोंदणी, परवाने, वाहन हस्तांतरण आणि इतर प्रलंबित कामांमधील बॅकलॉग कमी करण्याचे मोठे आव्हान नव्या अधिकाऱ्यांसमोर असणार आहे. तसेच नागरिकांना दलालांवर अवलंबून राहावे लागू नये, पारदर्शक आणि सुलभ सेवा उपलब्ध व्हावी, अशी सर्वसामान्यांची अपेक्षा आहे.
बीड जिल्हा हा ऊसतोड कामगारांचा जिल्हा म्हणून ओळखला जात असल्याने गळित हंगामात वाहनांशी संबंधित कामांसाठी मोठ्या प्रमाणात नागरिक आरटीओ कार्यालयात येत असतात. अशा वेळी नागरिकांची गैरसोय टाळून जलद आणि पारदर्शक सेवा देण्याचेही आव्हान आरटीओ आव्हाड यांच्यासमोर असेल.
दरम्यान, शेजारच्या आंबेजोगाई आरटीओ कार्यालयात शासनाने अत्याधुनिक वाहन तपासणी केंद्रासह नवीन इमारत उभारली आहे. त्याच धर्तीवर बीड आरटीओलाही भविष्यात प्रशस्त कार्यालयीन इमारत, आधुनिक वाहन तपासणी केंद्र आणि अत्याधुनिक ड्रायव्हिंग लायसन्स चाचणी ट्रॅक उपलब्ध व्हावा, अशी नागरिकांची अपेक्षा आहे.
सुरेश आव्हाड यांच्या नेतृत्वाखाली बीड आरटीओ कार्यालयातील कामकाज अधिक पारदर्शक, गतिमान आणि नागरिकाभिमुख होईल, अशी आशा जिल्ह्यातील वाहनधारक व सर्वसामान्य नागरिक व्यक्त करत आहेत.
