जिल्हा नियोजनसह, पर्यटन, कृषी पर्यटन, खनिज परिषद, कौशल्य विकास आदी विषयी सविस्तर चर्चा, अन दिली जिल्ह्याच्या विकासाला दिशा
बीड – बीड जिल्ह्याचे पालकमंत्री धनंजय मुंडे यांच्या अध्यक्षतेखाली आज बीड जिल्हाधिकारी कार्यालयात जिल्हा नियोजनसह विविध मॅरेथॉन बैठकांचे जवळपास सलग 6 तासांचे सत्र पार पडले!
या 6 तासांच्या बैठकांमध्ये धनंजय मुंडे यांनी बीड जिल्हा नियोजन समितीचा आढावा घेऊन, उद्दिष्ट पूर्तीच्या दृष्टीने सर्व यंत्रणांना निर्देश दिले.
त्याच पाठोपाठ बीड जिल्ह्यातील पर्यटन, कृषी पर्यटन, आपत्ती व्यवस्थापन, कौशल्य विकास, खनिज परिषद, शिक्षण, पोलिसिंग यांसह विविध महत्वाच्या विषयांचा सविस्तर आढावा घेतला. त्याचबरोबर जिल्ह्यातील अनेक विकासकामांना दिशा देण्याचे काम पालकमंत्री श्री मुंडे यांनी केले.
6 तासांच्या बैठकीत धनंजय मुंडे एकदाही उठलेले किंवा फोन वर बोलताना सुद्धा दिसले नाहीत. पालकमंत्री म्हणून निवड झाल्यानंतर धनंजय मुंडे हे जिल्ह्याच्या विकासाच्या बाबतीत झपाट्याने काम करताना दिसत आहेत.
पर्यटन, पुरातत्व विभागाचे प्रस्ताव, बीड जिल्ह्यातील गहिनीनाथ गड, नारायणगड आदी गडाच्या विकासाचे सादरीकरण पाहताना धनंजय मुंडे यांनीही यावर आपले अभ्यासपूर्ण मत मांडले.
बैठकीस धनंजय मुंडे यांच्यासह जिल्ह्याच्या खासदार, बीडचा एक अपवाद वगळता सर्व आमदार, संबंधित विभागांचे वरिष्ठ अधिकारी आदी उपस्थित होते.
बीड जिल्ह्याचे पालकत्व स्वीकारल्याच्या दुसऱ्याच दिवशी धनंजय मुंडे यांनी बीड गाठले, आता सत्कार नको तर काम करू द्या, अशी भूमिका मांडली. आज बैठकीसह सामान्य लोकांनाही वेळ देता यावा, यासाठी धनंजय मुंडे यांनी रविवारी रात्रीच बीड गाठले होते.
आजही सकाळी 10 वाजल्यापासून सामान्य नागरिक व कार्यकर्त्यांची निवेदने स्वीकारणे, त्यांचे प्रश्न/मागण्या मार्गी लावणे, राष्ट्रवादी काँग्रेस पक्ष्याच्या नियोजित कार्यालयाची पाहणी, आदी कामे त्यांनी केली.
कृषी अभियांत्रिकीकरण योजनेतून वितरित करण्यात आलेल्या ट्रॅक्टर्सच्या वितरण समयी, धनंजय मुंडे यांनी शेतकऱ्यांना पीक विमा मिळण्याबाबतची आपली तळमळ व प्रयत्न याबाबत आत्मीयता व्यक्त केली. मागील आठवड्यात धनंजय मुंडे यांनी बोलताना ‘जिल्ह्याची तसविर आणि तकदिर बदलायची आहे’ असे वक्तव्य केले होते. त्यादृष्टीने धनंजय मुंडे हे प्रत्येक पाऊल टाकताना दिसत आहेत.
जिल्हा नियोजन नंतर एकापाठोपाठ एक सलग चार विषयांच्या बैठका झाल्या, या सर्व बैठकांना खा.रजनीताई पाटील व खा.डॉ.प्रीतमताई मुंडे यादेखील शेवटपर्यंत उपस्थित होत्या.
बैठका झाल्यानंतर धनंजय मुंडे यांनी बीड शहरातील वृंदावन गार्डन येथील माहेश्वरी समाज दुर्गोत्सवसह अन्य दोन नवरात्री उत्सवाच्या ठिकाणी भेटी देऊन आरती केली. यावेळी स्थानिक पदाधिकारी आदी उपस्थित होते.
