पक्षप्रवेश प्रसंगी आमदार संदीप क्षीरसागर यांचे कार्यकर्त्यांसह मतदारांना आवाहन
भाजपाच्या युवक कार्यकर्त्यांचा राष्ट्रवादी काँग्रेस (शरदचंद्र पवार) पक्षात प्रवेश
बीड (प्रतिनिधी) बीड विधानसभा मतदारसंघात भारतीय जनता पक्षातील अनेक युवक कार्यकर्त्यांनी शनिवारी (दि.१६) राष्ट्रवादी काँग्रेसचे नेते राजेंद्र मस्के यांच्या संपर्क कार्यालयात राष्ट्रवादी काँग्रेस (शरदचंद्र पवार) पक्षात प्रवेश केला. याप्रसंगी आ. संदीप क्षीरसागर म्हणाले, बीड मतदार संघाचे प्रतिनिधित्व करत असताना मागील पाच वर्षात लोकांच्या समस्या जवळून जाणता आल्या, त्यांचे प्रश्न सोडवण्यासाठी शासन दरबारी सातत्याने पाठपुरावा करून विविध योजनांचा लाभ मिळवून दिला. लोकप्रतिनिधी म्हणून हे कर्तव्य बजावले. मतदारसंघाच्या विकासातून आपण जनतेचा विश्वास कमावला आहे. म्हणून येत्या २० तारखेला मतदान करताना अनुक्रमांक ३, तुतारी वाजवणारा माणूस या चिन्हासमोरील बटन दाबून पुन्हा एकदा आपल्या सेवेची संधी द्या,असे आवाहन आ.क्षीरसागर यांनी केले.
शनिवारी बीड येथील राष्ट्रवादी काँग्रेसचे नेते राजेंद्र मस्के यांच्या संपर्क कार्यालयात आ. संदीप क्षीरसागर, राजेंद्र मस्के, माजी आ. सय्यद सलीम व इतर प्रमुख पदाधिकाऱ्यांच्या उपस्थितीत भाजपच्या युवक कार्यकर्त्यांनी राष्ट्रवादी काँग्रेस (शरदचंद्र पवार) पक्षात जाहीर प्रवेश केला. याप्रसंगी सर्वांचे आ. संदीप क्षीरसागर यांनी पक्षात स्वागत केले. आगामी काळात आपल्या खांद्याला खांदा लावून बीड मतदार संघाच्या विकासासाठी काम करू. आपल्या सर्वांचे आशीर्वाद आणि सदिच्छा माझ्या कायम पाठीशी असून बीड मतदारसंघाला विकासाच्या उंचीवर घेऊन जाण्यासाठी आपण सोबत मिळून काम करू अशी ग्वाही त्यांनी उपस्थित कार्यकर्त्यांना दिली.
यावेळी आ.संदीप क्षीरसागर म्हणाले,दिलेला शब्द पाळून विश्वास सार्थ ठरवल्याने मतदारसंघातील मायबाप जनता कायम आपल्याला आशीर्वाद देत आलेली आहे आगामी काळातही मतदारसंघाच्या विकासाचे व्हिजन घेऊन आपण वाटचाल करणार आहोत. अशा वाटचालीत आपल्या सर्वांची योगदान नक्कीच ऊर्जादायी असणार आहेत. त्यामुळे सर्वांनी येत्या २० तारखेला तुतारी वाजवणारा माणूस या चिन्हासमोर मतदान करून आपले अमूल्य मत द्यावे असे आवाहन केले. याप्रसंगी युवक कार्यकर्ते मोठ्या संख्येने उपस्थित होते सर्वांचे उपस्थितीत आ. संदीप क्षीरसागर, माजी आ.सय्यद सलीम, राजेंद्र मस्के यांचा पुष्पहार घालून सत्कार करण्यात आला
