बीड प्रतिनिधी – महावितरणचा बेजबाबदारपणा आणि हायटेक कंपनीच्या निष्काळजीपणामुळे बालेपीरच्या गोरे वस्ती भागातील शेख आवेज शेख परवेज या 15 वर्षीय मुलाचा उघड्या डीपीला चिटकून मृत्यू झाल्याची दुर्देवी घटना रविवारी सायंकाळी घडली होती. या प्रकरणात महावितरणचे संबंधित अधिकारी आणि हायटेक कंपनीविरूध्द तात्काळ गुन्हा दाखल करा अशी मागणी करत नगराध्यक्ष प्रतिनिधी शेख मुजीब यांच्यासह नगरसेवक व नागरीकांनी जिल्हा रूग्णालयाच्या बाजूला असलेल्या हायवेवर सोमवारी तब्बल दीड तास रास्ता रोको केला. भर उन्हात शेख मुजीब यांच्यासह नगरसेवक आणि नागरीक रोडवर ठिय्या मांडून बसले होते. जोपर्यंत गुन्हा दाखल होत नाही तोपर्यंत उठणार नाहीत अशी आक्रमक भुमिका यावेळी आंदोलकांनी घेतली होती. अखेर आ.विजयसिंह पंडित यांनी पोलीस अधिक्षकांशी मोबाईलवरून चर्चा करत नंतर आंदोलकांशीही मोबाईलवरूनच संवाद साधून या प्रकरणात तातडीने कारवाई करू असे आश्वासन पोलीस अधिक्षकांनी दिल्याचे सांगितले. त्यानंतर आंदोलन मागे घेण्यात आले.
बीड शहरातील बालेपीर भागातील गोरे वस्ती येथील शेख आवेज शेख परवेज या 15 वर्षीय मुलाच्या मृत्यूस कारणीभूत असलेले महावितरण संबंधित अधिकारी आणि त्याची जबाबदारी असलेल्या हायटेक कंपनीवर गुन्हा दाखल करावा अशी मागणी मयत मुलाच्या नातेवाईकांनी केली होती. आज सकाळी नगराध्यक्ष प्रतिनिधी शेख मुजीब, राष्ट्रवादी काँग्रेसचे माध्यम प्रमुख भागवत तावरे, नगरसेवक महेश धांडे, नगरसेवक रोहिल दादा, नगरसेवक अय्युब खान, नगरसेवक मकसुद खान, नगरसेवक खय्युम इनामदार, अॅड.सय्यद खाजा, मोहम्मद सादेक मेंबर, शाहेद पटेल यांच्यासह नागरीकांनी आज सकाळी जिल्हा रूग्णालयाच्या परिसरातील शवविच्छेदन गृहासमोर हायवेवर रास्ता रोको आंदोलन सुरू केले. तब्बल दीड तास सर्व आंदोलक भर उन्हात रस्त्यावर ठिय्या मांडून बसले होते. घटनास्थळी पोलीस उपअधिक्षक पुजा पवार, स्थानिक गुन्हे शाखेचे पो.नि.शिवाजी बंटेवाड, ग्रामीण पोलीस ठाण्याचे पोलीस निरीक्षक सोमनाथ जाधव आदिंनी भेट दिली. आ.विजयसिंह पंडित यांनीही या प्रकरणाची दखल घेत तातडीने पोलीस अधिक्षक नवनीत काँवत यांच्याशी मोबाईलवरून चर्चा करून त्यांना घटनेची माहिती सांगितली. पोलीस अधिक्षकांनी या प्रकरणात तातडीने चौकशी करून कारवाईचे आश्वासन दिल्यानंतर हा रस्ता रोको आंदोलन मागे घेण्यात आले.
तब्बल 20 तासानंतर नातेवाईकांनी मृतदेह ताब्यात घेतला
बीड शहरातील बालेपीर भागातील गोरे वस्ती येथील 15 वर्षीय शेख आवेज शेख परवेज याचा मृत्यू झाल्याची दुर्देवी घटना घडल्यानंतर या भागातील नागरीकांसह नातेवाईकांनी आक्रमक भुमिका घेतली होती. उघड्या डीपीला चिटकल्याने शॉक बसून त्याचा मृत्यू झाल्याने याला महावितरणचा बेजबाबदारपणा कारणीभूत असल्याचा आरोप नातेवाईकांनी केला होता. मात्र आज सकाळपर्यंत महावितरणने या प्रकरणाची कसलीच दखल घेतली नव्हती. त्यामुळे शेवटी लोकप्रतिनिधींना आणि नागरीकांना रस्त्यावर उतरावे लागले, आंदोलन करावे लागेल. त्यानंतर पोलीस प्रशासनाने चौकशी करून कारवाईचे आश्वासन दिल्याने आज दुपारी 1 वाजण्याच्या सुमारास मुलाचा मृतदेह नातेवाईकांनी ताब्यात घेतला.
—–
चौकशी करून कारवाई करणार- पोलीस अधिक्षक नवनीत काँवत
आ.विजयसिंह पंडित यांनी पोलीस अधिक्षकांशी मोबाईलवरून चर्चा करून घटनेची माहिती दिली. या प्रकरणी लोकांच्या भावना त्यांच्या समोर मांडल्या. त्याची दखल घेत पोलीस अधिक्षक नवनीत काँवत यांनी या सर्व घटनेची चौकशी करून कारवाई करणार असल्याचे आश्वासन दिले. त्यानंतर आ.विजयसिंह पंडित यांनी मोबाईलवरून आंदोलकांशी संवाद साधून पोलीस अधिक्षकांशी झालेल्या चर्चेची आणि त्यांनी दिलेल्या कारवाईच्या आश्वासनाची माहिती दिली. त्यानंतर आंदोलन मागे घेण्यात आले.
