बीड प्रतिनिधी : बीड विधानसभा मतदारसंघातील राष्ट्रवादी काँग्रेस महायुतीचे उमेदवार आणि माझा मुलगा डॉ.योगेश क्षीरसागर निवडणूक लढवत आहे. त्याला भरघोस मतांनी निवडून द्या, असे आवाहन माजी नगराध्यक्ष डॉ.भारतभूषण क्षीरसागर यांनी एका व्हिडीओच्या माध्यामातून मतदारांना केले आहे.
बीड शहरात केलेली विकासकामे फोटोसह व्हिडीओमध्ये दाखवत आतापर्यंत केलेल्या विकासकामांचा लेखाजोखा पुराव्यांसह त्यामध्ये मांडला आहे. व्हिडीओमध्ये डॉ.भारतभूषण क्षीरसागर म्हणाले की, बीड शहरवासियांना विनंती करतो की विकासासाठी आपण माझ्यासोबत राहिलात, त्याप्रमाणे डॉ.योगेशला मतदान करून सहकार्य करावे. सर्व धर्म समभाव या भावनेतून योगेश काम करत आहे. योगेशच्या मार्फत कोट्यावधींची कामे शहरात होत आहेत. माझ्या कार्यकाळात देखील शहरातील ८० टक्के सिमेंट रोड झालेले आहेत. मराठा भवनाला जागा दिली, मराठा समाजाला आरक्षण मिळावे यासाठी ठराव मांडणारी बीड ही राज्यातील पहिली नगरपरिषद आहे. आपण माझ्यावर विश्वास ठेवला. २५-३० वर्ष आपण प्रेम केलं. त्याबद्दल मी आपले आभार मानतो. बीड शहर हे मी माझे घर मानतो. गेल्या अनेक वर्षांपासून डॉ.योगेश आणि सारिका सामाजिक काम करत आहेत. मी केलेल्या कामाची पावती म्हणून घड्याळ या निशानीसमोरील बटन दाबून डॉ.योगेशला निवडून द्या ही विनंती करतो, असेही शेवटी माजी नगराध्यक्ष डॉ.भारतभूषण क्षीरसागर यांनी म्हटले.
