राष्ट्रवादी काँग्रेसकडून मतदारसंघनिहाय निवडणूक जाहीरनामा प्रसिद्ध ;जाहीरनाम्यात ११ नवीन आश्वासने समाविष्ट ;अजित पवारांनी बारामतीतून, प्रदेशाध्यक्ष सुनिल तटकरे यांनी मुंबईतून तर धनंजय मुंडे यांनी परळीतून केला जाहीर
परळीसाठी अजितदादांचा वादा, पंचतारांकित एमआयडीसी, वैद्यनाथ तीर्थक्षेत्राचा महाकालच्या धर्तीवर, जायकवाडीचे पाणी आणणे यांसह 5 प्रमुख वचने
मुंबई – राष्ट्रवादी काँग्रेसचे राष्ट्रीय अध्यक्ष आणि उपमुख्यमंत्री अजित पवार आणि प्रदेशाध्यक्ष खासदार सुनिल तटकरे यांनी महाराष्ट्रातील लढवत असलेल्या विधानसभा मतदारसंघनिहाय निवडणूक जाहीरनामा (महाराष्ट्र घोषणापत्र) आज प्रसिद्ध केला असून या जाहीरनाम्यामध्ये अकरा नवीन आश्वासने समाविष्ट करण्यात आली आहेत.
राष्ट्रवादी काँग्रेस लढवत असलेल्या सर्व मतदारसंघात एकाचवेळी हा जाहीरनामा प्रसिद्ध करण्यात आला. बारामतीतून अजितदादा पवार, गोंदियामधून राष्ट्रीय कार्याध्यक्ष खासदार प्रफुल पटेल, नाशिकमधून ज्येष्ठ नेते मंत्री छगन भुजबळ, पक्षाचे प्रवक्ते तथा कृषिमंत्री धनंजय मुंडे परळीतून हे दूरदृश्यप्रणालीद्वारे सहभागी होते.
या जाहीरनाम्यामध्ये लाडकी बहीण योजनेची रक्कम २१०० रुपयांपर्यंत वाढवण्याचे जाहीर केले आहे. तर शेतकऱ्यांसाठी कर्जमाफी करण्यात येणार आहे. शिवाय अडीच लाख नोकऱ्या आणि ग्रामीण भागात ४५ हजार पाणंद रस्त्यांचे बांधकाम करण्याचे आश्वासन देण्यात आले आहे.
अजित पवार यांनी बारामती मतदारसंघातून बारामतीसाठी आणि पक्षाचा राज्याचा जाहीरनामा प्रसिद्ध केला. राष्ट्रवादी काँग्रेसने पहिल्यांदाच लढवत असलेल्या मतदारसंघनिहाय पक्षाचा जाहीरनामा प्रसिद्ध केला आहे. यावेळी राष्ट्रीय अध्यक्ष अजित पवार यांनी सरकार स्थापनेनंतर १०० दिवसात नवीन महाराष्ट्राचे व्हिजन जाहीर करु असे बारामतीतून माध्यमांशी बोलताना स्पष्ट केले. तर परळीतून धनंजय मुंडे यांनी पक्षाचा जाहीरनामा प्रकाशित करत दादांनी परळीला दिलेली 5 वचने प्रसिद्ध करण्यात आली.
याशिवाय प्रशिक्षणाद्वारे एक लाख विद्यार्थ्यांना दहा हजार मासिक स्टायपेंड देणार आहे. अंगणवाडी आणि आशा वर्कर कर्मचाऱ्यांना १५ हजार मासिक वेतन, सौर व अक्षय ऊर्जेला प्राधान्य देताना वीजबिल ३० टक्के कमी करण्यात येणार आहे. अत्यावश्यक वस्तूंच्या किमतीवर आळा, वृध्द पेंशन धारकांना महिन्याला २१०० रुपये अशी आश्वासनेही देण्यात आली आहेत.
लाडकी बहीण योजना, ४४ लाख शेतकऱ्यांना मोफत वीज, ५२ लाख कुटुंबांना तीन मोफत गॅस सिलेंडर, आर्थिक दुर्बल घटकातील मुलींना मोफत शिक्षणाचा समावेश, गरीब, मध्यमवर्गीय, युवक, महिलांच्या कल्याणासाठी… या जनतेच्या केंद्रस्थानी असलेल्या अनेक योजनांचा समावेश आहे. या योजनांना फार मोठा प्रतिसाद राज्यातील कानाकोपऱ्यातून मिळाला आहे. विशेष म्हणजे या सर्व योजना कुटुंब असेल किंवा युवक, महिला-भगिनींना आधार देण्याचा प्रयत्न केला आहे. या योजना जनतेच्या मनात खोलवर गेल्या आहेत असे सुनिल तटकरे यांनी यावेळी स्पष्ट केले.
राष्ट्रवादी काँग्रेसकडून सुमारे ३६ पानांचा जाहीरनामा प्रसिद्ध करण्यात आला असून या जाहीरनाम्याच्या मुखपृष्ठावर *महाराष्ट्रवादी घोषणापत्र* असे छापण्यात आले आहे. शिवाय आपल्या मतदारसंघातील विकासकामे आणि घोषणापत्रांच्या माहितीसाठी ९८६१७१७१७१ हा हेल्पलाईन नंबर देण्यात आला आहे.
*परळीला दादांचा वादा*
दरम्यान परळी मतदारसंघात धनंजय मुंडे यांच्या माध्यमातून पुढील काळात 5 प्रमुख कामे करण्याचा वादाच अजितदादांनी दिला आहे. यात प्रामुख्याने वैद्यनाथ तीर्थक्षेत्राचा उज्जैन महाकाल मंदिराच्या धर्तीवर सर्वांगीण विकास करणे, सिरसाळा येथे 2200 एकर जागेत पंचतारांकित एमआयडीसी कार्यान्वित करून उद्योगांना चालना देऊन मोठ्या प्रमाणात रोजगार निर्मिती करणे, दूध संकलन केंद्र उभारणे, औष्णिक विद्युत निर्मिती केंद्रात संच क्रमांक 9 ची उभारणी करणे व जुन्या औष्णिक विद्युत केंद्रात सौर ऊर्जा प्रकल्प उभारणे, जायकवाडीचे अडीच टीएमसी पाणी वाण धरणात तर एक टीएमसी पाणी तारुगव्हान येथे आणणे आणि परळी – बीड – नगर रेल्वे मार्ग जलद गतीने पूर्ण करून परळी वरून मोठ्या शहरांशी थेट कनेक्टिव्हिटी सुरू करणे ही 5 प्रमुख वचने अजित पवार यांनी जाहीर केले आहेत. तर धनंजय मुंडे हे अंबाजोगाई तालुक्यातील मुडेगाव येथील कॉर्नर बैठकीतून या जाहीरनामा प्रकाशन कार्यक्रमास ऑनलाइन पद्धतीने उपस्थित होते.
