शेतकरी पुञ बजरंग सोनवणे यांनी महापुरुषांना अभिवादन करत उमेदवारी अर्ज दाखल केला

बजरंगबप्पांना निवडणूकीसाठी शेतकऱ्याने दिली पाच हजाराची मदत

उमेदवारी अर्ज भरण्यास येताना ठिकठिकाणी स्वागत

प्रारंभ । वृत्तसेवा

बीड : राष्ट्रवादी काँग्रेस पक्ष शरदचंद्र पवार व इंडिया आघाडीचे उमेदवार बजरंग सोनवणे हे शहरातील व तालुक्यातील तिर्थक्षेत्रांचे दर्शन घेऊन तसेच महापुरुषांच्या पुतळ्यांना अभिवादन करून त्यांनी आज लोकसभेचा उमेदवारी अर्ज भरला. हा फॉर्म भरण्यासाठी राष्ट्रवादीचे प्रदेशाध्यक्ष जयंत पाटील हे येणार होते परंतु त्यांच्या हेलिकॅप्टरला तांत्रिक अडचण आल्यामुळे त्यांना तीनच्या आत फॉर्म भरण्यासाठी येता आले नाही, परंतु तीन नंतर मात्र जयंत पाटील बीडमध्ये दाखल झाले होते. शहरातील राष्ट्रवादीभवन कार्यालय याठिकाणी पदाधिकाऱ्यांना संबोधित करणार होते. महाविकास आघाडीचे उमेदवार बजरंग सोनवणे यांना आता शेतकरीसुद्धा निवडणूकीसाठी मदत देवू लागले आहेत. चाकरवाडी परिसरातील एका शेतकऱ्याने बजरंग सोनवणे यांना निवडणूकीसाठी पाच हजाराची मदत दिली आहे. यावरूनच लक्षात येते की ही निवडणूक आता जनतेने हातात घेतली आहे. ज्यावेळेस दिग्गज नेत्यांचा फौजफाटा एकीकडे व सर्वसामान्य वर्ग एकीकडे असतो अशावेळी मात्र क्रांती घडत असते. असेच चित्र बीड लोकसभा मतदारसंघात पहावयास मिळत आहे. फॉर्म भरतेवेळेस काँग्रेसच्या नेत्या खा.रजनीताई पाटील,आ.संदीप क्षीरसागर, माजी आ.सुनिल धांडे, माजी आ.सय्यद सलीम शिवसेना जिल्हाप्रमुख परमेश्‍वर सातपुते, यांच्यासह इतर पदाधिकारी उपस्थित होते.
बीड लोकसभेचे राष्ट्रवादी काँग्रेस पक्ष शरदचंद्र पवार पक्षाचे व इंडिया आघाडीचे अधिकृत उमेदवार बजरंग सोनवणे यांनी सोमवारी सकाळी त्यांच्या मातोश्री व अर्धागिनी यांनी औक्षण केल्यानंतर ते आपल्या आई – वडिलांचे आशीर्वाद घेऊन पवनसुत निवासस्थानातून बाहेर पडले. त्यांनी शहरातील महादेव मंदिर, स्वामी समर्थ मठ, दर्गाचे दर्शन घेवून कुंबेफळ येथील श्री सिद्धी विनायक मंदिर व दर्गाचे दर्शन घेतले. त्यानंतर त्यांचे जन्मस्थळ सारणी (आ.) येथील हनुमान मंदिरात हनुमानाचे दर्शन घेतले. त्यानंतर आनंदगाव (सा.) येथे खंडोबाचे दर्शन घेऊन रामवाडगाव येथे प्रभू श्रीरामाचे दर्शन घेऊन सोनेसांगवी, गोटेगाव, माळेगाव, साळेगाव चिंचोली (माळी) मार्गे हनुमंत पिंप्रीकडे रवाना झाले. त्यांनी उत्तरेश्वर महाराजांचे दर्शन घेऊन चाकरवाडी येथील ज्ञानेश्वर माऊलीच्या समाधीचे दर्शन घेतले. त्यानंतर बजरंग सोनवणे यांनी बीड शहरात येत छत्रपती शिवाजी महाराज, भारतरत्न डॉ. बाबासाहेब आंबेडकर, महात्मा जोतिबा फुले, सावित्रीबाई फुले, लोकशाहीर अण्णाभाऊ साठे, महात्मा बसवेश्वर यांच्या पुतळ्याला पुष्पहार घालून शहरातील प्रसिद्ध दर्गा आणि धार्मिक स्थळांना भेट देवून दर्शन घेत बीड येथे राष्ट्रवादी भवनातून राष्ट्रवादीचे प्रदेशाध्यक्ष जयंत पाटील, काँग्रेसच्या नेत्या खासदार रजनीताई पाटील, शिवसेनेचे बीड जिल्हा संपर्क प्रमुख किशोर पोतदार यांच्यासह इंडिया आघाडीतील सर्व घटक पक्षांचे नेते यांच्यासह निवडक कार्यकर्त्या समवेत अत्यंत साध्या पद्धतीने जिल्हाधिकारी कार्यालयात जावून त्यांचा उमेदवारी अर्ज दाखल केला.
जन्मगावी भव्य स्वागत
शेतकरी पुत्र बजरंग सोनवणे यांच्या जन्मगावी सारणी (आनंदगाव) येथे सर्व गावकऱ्यांनी त्यांच्यावर जेसीबीतून फुलांची उधळण करीत ढोल ताशाच्या गजरात भव्य मिरवणूक काढली. यावेळी महिलांनी औक्षण केले. त्याचबरोबर या मार्गावरील गावात त्यांचे कार्यकर्त्यांनी जंगी स्वागत केले.

शेतकऱ्याची शेतकरी पुत्राला मदत
बजरंग बप्पा सोनवणे हे चाकरवाडी येथे ज्ञानेशवर माऊली यांच्या समाधीचे दर्शन घेण्यासाठी आले असता बाळासाहेब पवार या शेतकऱ्यांनी शेतकरी पुत्र सोनवणे यांना निवडणूक लढण्यासाठी 5 हजार रुपयांच्या मदतीचा धनादेश सुपूर्द केला.