बीड जिल्ह्यात ६ ते १० नोव्हेंबर पर्यंत संवाद
बीड प्रतिनिधी :- खा.शरदचंद्र पवार साहेबांच्या लोकहितवादी धोरणांच्या प्रेरणेतून साकारली जाणारी युवा संघर्ष यात्रा २४ ऑक्टोबर पासून सुरू होत आहे. युवा संघर्ष यात्रा ६ नोव्हेंबर ते १० नोव्हेंबर या चार दिवसांत बीड जिल्ह्यातील विविध ठिकाणी जाऊन संवाद साधणार आहे. या यात्रेच्या पूर्वतयारीसाठी आ.संदीप क्षीरसागर यांनी रविवारी (दि.२२) रोजी बैठक घेतली. तसेच या युवा संघर्ष यात्रेमध्ये जिल्ह्यातील युवकांनी सहभागी होण्याचे आवाहन आ.क्षीरसागर यांनी केले आहे.
महाराष्ट्रातील युवकांचे प्रश्न सोडविण्यासाठी व झोपलेल्या सरकारला जागे करण्यासाठी खा.शरदचंद्र पवार साहेबांच्या लोकहितकारी विचारांची प्रेरणा घेऊन आयोजित करण्यात आलेल्या युवा संघर्ष यात्रेची सुरुवात २५ ऑक्टोबर रोजी होत आहे. ही यात्रा चार दिवसांसाठी बीड जिल्ह्यात येणार असल्याने नियोजन करण्यासाठी राष्ट्रवादी काँग्रेस पक्षाचे जिल्हाध्यक्ष तथा बीड विधानसभा मतदारसंघाचे आमदार संदीप क्षीरसागर यांनी रविवार (दि.२२) रोजी राष्ट्रवादी काँग्रेस पक्षाचे जिल्हा मध्यवर्ती कार्यालय, राष्ट्रवादी भवन येथे पूर्वतयारी बैठक घेतली. या बैठकीस राष्ट्रवादी काँग्रेस पक्षाचे जिल्ह्यातील सर्व प्रमुख पदाधिकारी, महिला पदाधिकारी व युवा कार्यकर्ते मोठ्या संख्येने उपस्थित होते. तसेच युवकांच्या प्रश्नांसाठी काढण्यात येणार्‍या या यात्रेला, www.yuvasangharshyatra.com या वेबसाइटला भेट देऊन किंवा 9098390983 या संपर्क क्रमांकावर मिस्ड कॉल देऊन आपण पाठिंबा द्यावा असे आवाहनही आ.संदीप क्षीरसागर यांनी केले आहे.
*चौकट*
*काय आहे युवा संघर्ष यात्रा?*
कंत्राटी भरती, पेपरफुटी, भ्रष्टाचार, शिक्षकांची रिक्त पदे, युवा आयोगाची स्थापना, प्रयोगशील युवा शेतकऱ्यांसाठी विशेष योजना, 2 वर्षांपेक्षा अधिक काळ बेरोजगार असलेल्या युवांच्या शैक्षणिक कर्जावरील व्याज सरकारने भरावं, नोकरदार महिलांसाठी जिल्हानिहाय वसतिगृह, शक्ती कायदा, सारथी, बार्टी, महाज्योती या संस्थांचे सक्षमीकरण, शाळा दत्तक योजना बंद करणे, रिस्कीलिंग, 2 टायर दर्जाच्या शहरात IT कंपन्या आणण्यासाठी स्वतंत्र धोरण आखणे, तालुका पातळीवर औद्योगिक युनिट सुरू करणे, प्रत्येक जिल्ह्यात विद्यार्थ्यांसाठी वसतिगृह, क्रीडा विभागाचे सक्षमीकरण करून होतकरू युवांना संधी देणं या आणि अशा अनेक मुद्द्यांवर ही युवा संघर्ष यात्रा असणार आहे. दसऱ्याच्या दिवशी 24 तारखेला महात्मा फुले वाडा, लाल महाल या ठिकाणी भेट देऊन आणि नंतर का.शरदचंद्र पवार साहेब हे युवांशी संवाद साधतील आणि या यात्रेची औपचारिक सुरुवात होईल. व दुसऱ्या दिवशी म्हणजेच 25 ऑक्टोबरपासून तुळापूर येथील छत्रपती संभाजी महाराजांच्या स्मारकाला अभिवादन करून यात्रेला प्रत्यक्ष सुरुवात होणार आहे. ही यात्रा पुणे, नगर, बीड, जालना, परभणी, हिंगोली, वाशिम, अमरावती, यवतमाळ, नागपूर या दहा जिल्ह्यातील 28 तालुके आणि 460 पेक्षा अधिक गावांमधून जाणार आहे.
