प्रथम स्मृतिदिनानिमित्त राजेभाऊ फड व दीपक नाना देशमुख यांचे अभिवादन
परळी : मस्साजोग ग्रामपंचायतीचे कर्तबगार व लोकाभिमुख सरपंच स्वर्गीय संतोष अण्णा देशमुख यांच्या प्रथम स्मृतिदिनानिमित्त आज राष्ट्रवादी काँग्रेस पक्ष (शरद पवार गट) प्रदेश सरचिटणीस राजेभाऊ फड आणि परळी नगरपरिषदेचे माजी नगराध्यक्ष, पक्षनेते दीपक रंगनाथ देशमुख यांनी मस्साजोग येथे त्यांच्या निवासस्थानी जाऊन त्यांच्या प्रतिमेस पुष्पहार अर्पण करून भावपूर्ण अभिवादन केले. पक्षाचे पदाधिकारी व कार्यकर्त्यांचीही यावेळी उपस्थिती होती. कार्यक्रमादरम्यान स्व.संतोष अण्णा देशमुख यांचे बंधू धनंजय देशमुख यांना दोन्ही नेत्यांनी आधार देत सांत्वन केले. स्वर्गीय अण्णांच्या आठवणींनी परिसर भारावून गेला असून अनेकांच्या डोळ्यात अश्रू दाटले.
संतोष अण्णा देशमुख यांच्या निर्घृण हत्येला एक वर्ष पूर्ण झाले असले, तरी गुन्हेगारांना आजतागायत शिक्षा न झाल्याबद्दल उपस्थितांनी तीव्र खेद व्यक्त केला. “संतोष अण्णा यांच्या मारेकऱ्यांना आजपर्यंत कठोर शिक्षा मिळाली असती, तर हाच दिवस त्यांना खरी भावांजली ठरला असता,” असे अंतःकरणाला भिडणारे शब्द दीपक नाना देशमुख यांनी यावेळी व्यक्त केले. राजेभाऊ फड यांनीही संतोष अण्णांच्या कार्याची आठवण करून देत न्याय मिळण्याची अपेक्षा व्यक्त केली.
गावाच्या विकासासाठी झटणाऱ्या एका समर्पित सरपंचाची झालेली हत्या हे संपूर्ण क्षेत्रासाठी दु:खद असल्याचे मत यावेळी व्यक्त करण्यात आले.
