१०.५८ लाखांचा मुद्देमाल जप्त.
Beed : पोलीस स्टेशन पिंपळनेरच्या पथकाने मौजे पिंपळनेर शिवारात एका शेतावर छापा टाकून, कांद्याच्या पिकात लपवून केलेली अफूची बेकायदेशीर लागवड उघडकीस आणली आहे. या कारवाईत सुमारे ४२ किलोपेक्षा जास्त वजनाची अफूची झाडे जप्त करण्यात आली असून आरोपीविरुद्ध एन.डी.पी.एस. (NDPS) कायद्यांतर्गत गुन्हा दाखल करण्यात आला आहे.
घटनेचा तपशील:
दिनांक २७.०२.२०२६ रोजी पिंपळनेर पोलिसांना खात्रीशीर बातमी मिळाली होती की, विशाल भगवान इतापे (वय २९, रा. पिंपळनेर) हा आपल्या शेतात अफूच्या झाडांची बेकायदेशीर लागवड व जोपासना करत आहे. या माहितीच्या आधारे वरिष्ठ पोलीस अधिकाऱ्यांच्या परवानगीने आणि महसूल विभागाच्या राजपत्रित अधिकाऱ्यांच्या उपस्थितीत दुपारी १५.०० वाजता सदर शेतावर छापा टाकण्यात आला.
जप्त केलेला मुद्देमाल:
अफूची झाडे: शेतातील कांदा व लसूण पिकाच्या मध्यभागी लावलेली अफूची हिरवीगार झाडे पोलिसांनी उपटून जप्त केली.
एकूण वजन: जप्त केलेल्या अफूच्या झाडांचे एकूण वजन ४२ किलो ३५५ ग्रॅम भरले.
बाजार मूल्य: जप्त करण्यात आलेल्या या मालाची अंदाजे किंमत १०,५८,८७५/- रुपये इतकी आहे.
कारवाई पथक:
सदर कारवाई मा नवनीत काँवत, पोलीस अधीक्षक, सचिन पांडकर अपर पोलीस अधीक्षक, पूजा पवार पोलीस उप अधीक्षक यांच्या मार्गदर्शनात सपोनि श्री. घुगे, पोउपनि गोलवाल, शिंदे, ग्रेड पोउपनि आत्माराम गर्जे आणि पोलीस कर्मचारी वनवे, घुमरे, पठाण, ढाकणे, तावरे व चालक पवार यांच्या पथकाने केली. या मोहिमेत महसूल विभागाचे प्रतिनिधी म्हणून श्री. प्रशांत ढोले (ग्राम महसूल अधिकारी) आणि कृषी सहाय्यक शिंदे उपस्थित होते.
कायदेशीर कारवाई:
आरोपी विशाल भगवान इतापे याच्या विरुद्ध अमली पदार्थ विरोधी कायदा (NDPS Act, 1985) च्या कलम ८(क) आणि १५ अन्वये गुन्हा नोंदवण्यात आला आहे.
