तक्रारदाराकडे पन्नास हजाराची केली होती मागणी, तडजोडीत 20 हजारात ठरले
प्रारंभ वृत्तसेवा
बीड : परळी येथील वादग्रस्त असलेले तहसीलदार व्यंकटेश मुंडे गेल्या अनेक वेळा चर्चेत आले होते. विशेष म्हणजे नुकत्याच पार पडलेल्या लोकसभा निवडणुकीमध्ये या अधिकाऱ्यांना मतमोजणी पासून दूर ठेवा, अशी तक्रार जिल्हाधिकाऱ्यांकडे खासदार बजरंग सोनवणे यांनी केली होती, परंतु याची दखल घेण्यात आली नाही. यानंतर आज त्यांना 20 हजाराच्या लाच प्रकरणी एसीबीने ताब्यात घेतले आहे. या कारवाईने महसूल विभागात मोठी खळबळ माजली आहे.
परळी येथील वादग्रस्त तहसीलदार व्यंकटेश मुंडे हे गेल्या अनेक वर्षापासून परळी येथे तहसीलदार म्हणून कार्यरत आहेत. त्यांनी तक्रारदाराकडून सालंसी (ऐपत प्रमाणपत्र) काढण्यासाठी पन्नास हजार रुपयाची मागणी केली होती, यानंतर 20 हजारांमध्ये सौदा झाला. या सर्व बाबीच्या अनुषंगाने बीड एसीबीने सापळा रचत ही कारवाई करण्यास सुरुवात केली. परंतु तक्रारदाराच्या हालचालीनंतर तहसीलदार मुंडे यांनी रक्कम स्वीकारण्यास टाळाटाळ केली. परंतु या दरम्यान एसीबीकडे अनेक पुरावे आल्यामुळे एसीबीने त्यांना ताब्यात घेत पुढील प्रक्रिया करण्यास सुरुवात केली आहे. याप्रकरणी परळी पोलीस ठाण्यात गुन्हा नोंद होत असल्याची माहिती मिळत आहे.
